（長文注意，另外對愛狗人士說聲抱歉，暫時慣咗口🙇🏻♀️）
發夢有人話見到有啲缺乏經驗嘅手足企前線，唔係好知點做，所以想分享少少心得：
如果你想守住一條路，前面要set三角鐵馬陣，尖嘅一面向出，但唔好將啲鐵馬綁死晒做一列，咁樣會失去機動性，令前線難以推進擋狗。前線第一排要有防具（最好有盾，浮板是好東西😉），同負責推/拉三角鐵馬；第二排捉實第一排背包，用遮幫手擋第一波攻擊，但盡量唔好阻擋己方視線；第三、四排要準備隨時補位、救人，可準備長物幫手拉開與狗距離，或使用可阻擋狗視線嘅物品（你懂的）；後排嘅人唔好輕易跑走，要穩住陣型，一行拉實一行，邊度唔夠人自己補位。要郁時盡量捉住前面嘅人，確保陣型唔好散， 但係要留位畀人向後走。救人時要一group人一齊出去救，唔好由得手足單獨被打。
明白好多新手面對惡犬易怯，但唔好見到啲狗行埋嚟就嚇到即刻掉頭跑，因為陣型一散，啲狗就會更易狂攻同打人、拉人。前線用鐵馬頂住，後面如果夠人/有增援路線就守住防線，如果後援不足，撤退時要面向對家拉住鐵馬向後有節奏地慢慢後退，退到對方唔會再推進嘅位置就夠。除非極緊急情況，否則唔好人走晒，撇下三角鐵馬，咁會白白浪費大家辛苦砌嘅防線。
另外真係請各位盡量帶齊足夠裝備，發夢見到有人企第一排連頭盔都冇戴，咁嘅裝備莫講話衝擊，你連守住條防線都做唔到。企得落場就唔好抱住「反正我都唔會企前排，無所謂啦」嘅心態輕視裝備，有時你冇諗過企前都會無啦啦上咗前，所以最基本裝備一定要有。
做守防線嘅人要有覺悟，你一輕易撤退，另一邊嘅手足就好危險。當狗嘅數目唔多過前線手足，其實唔駛驚得咁交關。另外留意啲狗嘅準備動作，但唔駛見到佢哋拎支旗出嚟/一郁就驚，冷靜觀察。
大家加油。
Search